2014-05-26
太陽報
今個星期五只係有灣仔捷船街迷你住宅地截標。今次幅地係本年度賣地表首幅推出地皮，雖然近排該區政府地同私人住宅項目都錄做到好價，可惜呢幅地無車路直達，地價難望有突破，市場估計每方呎樓面地價最高約1.25萬元，同舊年批出嘅適安街地皮呎價差唔多，估值最高大約1.82億元。
過往通常係兩幅地孖住上，劉Sir收到風話因為本年度賣嘅地，唔少仲改劃緊用途，趕唔切拎出嚟賣，所以星期五得一幅地截標。呢幅灣仔捷船街迷你地，佔地只係約2,906方呎，總樓面就大約1.45萬方呎，係今季賣地計劃規模最細嘅地皮。
樓面呎價料1.2萬
老友高緯環球張翹楚就覺得，嚟緊截標嘅捷船街住宅地，位置上比較輸蝕，雖然距離港鐵灣仔站唔係太遠，但始終無車路直達地盤，佢預期地皮樓面呎價約1.2萬元。市場最高估值就約1.82億元，樓面呎價大約1.25萬元。
灣仔區近排住宅項目地價都幾好，好似同屬迷你住宅地嘅灣仔適安街地皮，舊年九月就由信置（00083）以接近1.4億元投得，樓面呎價約12,497元；又好似萬科置業（香港）最近收購嘅同區聯發街住宅項目，每方呎樓面地價更超過1.5萬元。
同區二手方面，老友中原張永泉話，自從區內新盤囍匯推出後，就成為咗灣仔樓市焦點，最近區內二手市況比較淡靜，今個月買賣成交都未夠20宗，而同區樓價就以樓齡較新的星域軒及嘉薈軒較高，平均實用呎價分別約2及2.6萬元。
大道東地待推出
其實賣地表仲有一幅灣仔住宅地有待推出，呢幅皇后大道東269號呂祺教育服務中心地皮，係今個年度新增地皮，而政府喺兩年前已開始着手改劃土地用途做住宅發展，呢幅地皮佔地約1.32萬方呎，以地積比率7.5倍計算，總樓面約9.9萬方呎。
劉Sir