Your browser does not support JavaScript! In order to see this website, please enable JavaScript!
我們偵測到您的瀏覽器不支持JavaScript!為了可以使用本網站,請開啟JavaScript!
三月 29, 2024 星期五 多雲 24° 86%

樓市出更:批則加快五個月最多

2014-04-04    太陽報
近年政府頻頻批出住宅用地,唔少項目都陸續獲批建築圖則。劉Sir知道,二月份屋宇署批咗7項住宅及商住項目嘅圖則,係近五個月最多,最有睇頭係新地(00016)喺一一年拍賣投番嚟嘅東半山司徒拔道嶺南書院舊址,可以起19幢洋房同5幢分層住宅,另信置(00083)嘅坪洲東灣B地盤都順利獲批圖則。 劉Sir參考屋宇署截至二月底嘅最新數據,該署一共批出咗15份建築圖則,其中有7項係住宅及商住發展,數字係舊年九月以來最多。 政府近年密密手推出土地,所以其中3個正正係政府批出嘅住宅項目,好似上述嘅前嶺南書院豪宅項目,新地一一年用咗44.9億元拍賣投返嚟,每方呎樓面地價約莫2.48萬元。 項目剛獲准興建19幢2至3層高洋房,同5幢7層高分層住宅,總樓面約18.1萬方呎,提供大約72伙。 至於信置一二年招標投得嘅坪洲東灣B地盤,亦獲批發展10幢洋房同埋1幢寫字樓;另香港太古集團舊年三月以每方呎1.51萬元高價投返嚟嘅大嶼山長沙嶼南道項目,准建2幢2層高洋房。 私宅落成動工均落後 而最近建議縮減規模,由前首席大法官楊鐵樑外父譚雅士持有嘅薄扶林道128號大宅,都獲准作重大修訂,興建1幢16層高住宅,現有大宅就會改建為1幢2層高住宅。 不過,私宅落成數字仍偏低,二月份僅5伙,頭兩個月加埋都係得194伙,對比全年預測數字17,614伙,達標1.1%。動工量亦未追得上,二月有246伙動工,按月少咗八成,係近三個月低位。 筲箕灣地估值增10% 但大家對住屋供應又唔使咁悲觀,筲箕灣愛勤道同沙田大圍美田路兩幅住宅地會喺今日截標,老友高緯環球張翹楚因應近排灣仔住宅地價理想,調高筲箕灣地估值至方呎約9,500元,比起最初估算高咗約一成,係市場上限價。 至於同日截標嘅長沙灣道商業地,億京發展黎裕宗已靜靜雞話畀劉Sir知,話會入標,因為佢哋喺區內有發展經驗。