2021/12/09
湯文亮
昨日收到幾個由租客送來的果籃，如果唔了解詳情，一定會覺得很奇怪，因為當日我唔肯減租給那些租戶，除非他們的食肆可以提升至C類。
C類食肆已盡力 如生意仍差可減租
當時租客話很難，因為超過一半員工的政治主觀性很強，寧願被炒都唔去打疫苗。如是者過了3個月，蝕到班租客牙痛，但見到其他C類食肆的生意唔錯，唯有硬着心腸叫所有員工打疫苗，唔肯打的就要離職。有人被炒絕對不出奇，但原來有一些死話唔肯打疫苗的員工其實早已打了，未打的不是太多，始終是自己條命，點解拗氣唔肯打疫苗？租客食肆變成C類，如果生意仍然唔好，當然可以減租，但市面上有咁多B類食肆，無形中將客人送給C類食肆，生意比疫情前還要好，減唔減租就由業主自己決定。
當時有租客話我太殘忍，我話對人仁慈其實是對自己殘忍，租客任由員工唔打疫苗，不能升呢，生意唔好應該由他們自己負責，點解要我幫手承擔？如果是C類食肆租客又唔同，他們已經盡了力，業主減租也是應該。
不少飲食業員工誓死唔打疫苗，就算打了都唔認，原因是餐廳生意唔好，工作一定不會太忙，又可以早收工兼在工作期間內去做檢測，有咁多福利點解要打疫苗？就算餐廳執笠，損失的又不是他們，業主唔減租，都是幫租客強迫員工去打疫苗，食肆租客得益最大，點能夠話我殘忍？
（文章內容純屬作家個人意見，並不代表本網頁立場）
贊助
