港失業率未反映最新情况

昨日早上去到茶餐廳，老闆同佢阿媽嘈交，我了解之後，今次真係民有民有理，官有官有理，原來茶餐廳一向用開10個伙記，上個月走了3個，老闆自然要請返3個人，但佢阿媽唔准，理由是根據政府失業率計算方法，係計過去3個月的每月平均數，如此茶餐廳只欠一個伙記，所以，只准老闆補充一個伙記。老闆大娘問我啱唔啱，我話政府做嘢一定啱，話唔啱即是質疑政府，有可能犯了新的法例。

不過國有國法，家有家規，茶餐廳用這個方法就唔啱，我話換句說話，茶餐廳在3個月前欠3個伙記，後來兩個月已經補充了，以政府3個月的平均數計法，茶餐廳仍然欠一個伙記，是否要請多一個伙記？老闆大娘話明白，仲請我食早餐。

統計處應公布每月失業率

有老友問點解香港政府計算失業率的時候，會用過去3個月的平均數？理由很簡單，就是維穩，倘若失業率突然上升，由於有另外兩個月幫補，大家睇到在過去3個月的失業率平均數仍然不高，以為疫情沒有重創香港。其實，這是錯到不得了做法，我們就是要知道被疫情重創，才知道怎樣防守，以為只有7%失業率都唔係好傷，原來失業率在1月份已經超過10%，真係重傷都唔知。

根據我的觀察，香港經濟正在復元，但失業率仍然會維持在7%甚至更高，這未免令到香港人更失信心，明明見到市面旺了很多，但失業率仍然高企，維穩變成恐懼。所以我認為，統計處應該公布每月的失業率，令市民對市况好壞能夠早作準備。